பெட்டாலிங் ஜெயா, 17 நவம்பர் (பெர்னாமா) -- விற்பனையாளராகப் பணிபுரிந்த பெண் ஒருவர் கொலை செய்யப்பட்ட வழக்கில் இரு ஆடவர்கள் இன்று பெட்டாலிங் ஜெயா மாஜிஸ்திரேட் நீதிமன்றத்தில் குற்றம் சாட்டப்பட்டனர்.
சிலாங்கூர், ஶ்ரீ கெம்பாங்கான், புளு வாட்டர் எஸ்டேட் சாலை வட்டம் அருகே கைகள் கட்டப்பட்டு நிர்வாண நிலையில் அப்பெண்ணின் உடல் கண்டெடுக்கப்பட்டது.
மாஜிஸ்திரேட் ஷாரில் அனுவார் அஹ்மட் முஸ்தஃபா முன்னிலையில் வாசிக்கப்பட்ட குற்றச்சாட்டை புரிந்து கொண்டதாக, தகவல் தொழில்நுட்ப அதிகாரியான கே.கார்த்திக் மற்றும் லாரி ஓட்டுநரான ஏ.ஹரிபிரசாந்த் ஆகிய இருவரும் தலையசைத்தனர்.
கொலை வழக்கு உயர் நீதிமன்ற அதிகாரத்திற்கு உட்பட்டிருப்பதால் அவர்களிடமிருந்து எந்த வாக்குமூலமும் பதிவு செய்யப்படவில்லை.
கடந்த அக்டோபர் 24-ஆம் தேதி மாலை மணி 6.18-இல் இருந்து அதிகாலை மறுநாள் அக்டோபர் 25-ஆம் தேதி அதிகாலை மணி 2.17-க்குள் 24 வயதான சரஸ்வது சான் சீ கியோங் என்பவரை சேர்ந்து கொலை செய்ததாக அவ்விருவர் மீதும் குற்றஞ்சாட்டப்பட்டுள்ளது.
குற்றம் நிரூபிக்கப்பட்டால் மரண தண்டனை அல்லது 30-இல் இருந்து 40 ஆண்டுகள் வரையிலான சிறை தண்டனை விதிக்க வகை செய்யும் குற்றவியல் சட்டம் செக்ஷன் 302-இன் கீழ் குற்றம் சுமத்தப்பட்டுள்ளது.
மரணத் தண்டனை விதிக்கப்படாத பட்சத்தில் அதிகபட்சம் 12 பிரம்படிகள் அளிக்கப்படலாம்.
வேதியியல் மற்றும் பிரேதப் பரிசோதனை அறிக்கைகளுக்காகக் காத்திருப்பதால் இவ்வழக்கு அடுத்தாண்டு ஜனவரி 16-ஆம் தேதி-க்கு ஒத்திவைக்கப்பட்டது.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
