உலகம்

தவெகவில் இணைந்தார் அதிமுகவின் செங்கோட்டையன்

27/11/2025 05:56 PM

தமிழ்நாடு, நவம்பர் 27 (பெர்னாமா) -- அண்ணா திராவிடர் முன்னேற்ற கழகம் - அதிமுகவை எம்.ஜி.ஆர் நிறுவிய காலம் தொட்டு அக்கட்சியில் பணியாற்றி வந்த மூத்த அரசியல்வாதி கே.ஏ செங்கோட்டையன் நடிகர் விஜயின் தமிழக வெற்றிக் கழகம் தவெகவில் இணைந்துள்ளார்.

அதிமுகவில் இருந்து நீக்கப்பட்ட முன்னாள் அமைச்சரான அவர் இன்று தவெகவில் இணைந்திருப்பதை அக்கட்சியின் தலைவரான விஜய் வரவேற்று சமூக ஊடங்களில் காணொளி வெளியிட்டுள்ளார்.

''அந்த இயக்கத்தின் இரு பெரும் தலைவர்களுக்கு ஒரு பெரிய நம்பிக்கைக்குரியவராக அரசியல் களத்தில் இருந்தவர். இப்படி 50 வருடங்களாக ஒரே இயக்கத்தில் இருந்த அண்ணன் செங்கோட்டையன் அவர்களின்  அரசியல் அனுபவமும் அரசியல் கலைப்பணியும் நம்முடைய தமிழக வெற்றிக் கழகத்திற்கு ஒரு பெரிய உறுதுணையாக இருக்கும் என்ற நம்பிக்கையுடன் இன்று அவருக்கும் அவரோடு இணைந்து பணியாற்ற நம்மோடு கைகோர்க்கும் அனைவரையும் மக்களுக்கு பணியாற்ற அழைக்கிறேன்,'' என்று விஜய் கூறினார்.

அதிமுக பொதுச் செயலாளார் எடப்பாடி பழனிசாமியுடன் எழுந்த மோதலைத் தொடர்ந்து, அக்கட்சியை ஒருங்கிணைக்க வேண்டும் என்று கூறிய செங்கோட்டையன் தற்போது இந்த புதிய அரசியல் பாதையைத் தேர்ந்தெடுத்துள்ளார்

தவெக உறுப்பினர் அட்டையை பெற்றிருக்கும் செங்கோட்டையனுக்கு கோவை, திருப்பூர், ஈரோடு, நீலகிரி என நான்கு மாவட்டங்களில் பொதுச் செயலாளர் பதவி வழங்கப்பட்டுள்ளது.

அதோடு, தலைமை நிர்வாகக் குழுவின் ஒருங்கிணைப்பாளராக அவர் செயல்படுவார் என்றும் தகவல்கள் வெளியாகியுள்ளன.

இதன் மூலம் 2026 தேர்தலில் தவெக உறுதியான மூன்றாவது அணியாக களமிறங்கும், என்று அரசியல் ஆர்வலர்கள் கணிக்கின்றனர்.

-- பெர்னாமா

பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)