பினாங்கு, 28 நவம்பர் (பெர்னாமா) -- தமிழ்மொழி, இலக்கன, இலக்கியத்தோடு வரலாற்றையும் முன்னிறுத்தி, தமிழோடு விளையாடு எனும் புதிர்ப்போட்டியை நான்காவது முறையாக ஏற்று நடத்துகிறது, பினாங்கு, மலேசிய அறிவியல் பல்கலைக்கழகம்.
தனியார் மற்றும் பொதுப் பல்கலைக்கழகங்களில் பயிலும் மாணவர்களுக்கு தமிழின் சிறப்பை உணர்த்தும் முதன்மை நோக்கத்துடன் நடத்தப்படும் இப்போட்டியின் மூலம் திரட்டப்படும் நிதி, தமிழ்ப்பள்ளி மாணவர்களுக்கு அடிப்படை பள்ளி உபகரணங்களை வாங்குவதற்குப் பயன்படுத்தப்படவுள்ளது.
வினாடி வினா என்ற அடிப்படையில் கேட்கப்படும் கேள்விகள் இப்போட்டியின் முத்தாய்ப்பு அங்கம் என்று அதன் இயக்குநர் கீர்த்தனா ராஜசேகரன் தெரிவித்தார்
ஆறு சுற்றுகளில் நடத்தப்படவுள்ள இப்புதிர்ப் போட்டியின் முதல் மூன்று சுற்றுகள் தகுதி சுற்றுகளாகவும், எஞ்சியவை இறுதி சுற்றுகளாகவும் பிரிக்கப்பட்டுள்ளதாக கீர்த்தனா மேலும் கூறினார்.
''இப்புதிர்ப்போட்டியில் பங்கேற்க இதுவரை 11 அணிகள் பதிவு செய்துள்ளன. ஒட்டுமொத்தமாக 16 அணிகள் மட்டுமே தேவைப்படுவதால், ஒரு பல்கலைக்கழக்கத்திலிருந்து இரு அணிகள் மட்டுமே பங்கேற்க முடியும்,'' என்றார் அவர்.
ஒவ்வோர் அணியும் 10 ரிங்கிட்டை முன்பணமாக செலுத்த வேண்டும் என்று கூறிய கீர்த்தனா, போட்டி நிறைவுற்றதும் அப்பணம் அவர்களிடமே வழங்கப்படும் என்று கூறினார்.
அதேவேளையில், இப்போட்டிக்கு நிதி திரட்டும் நோக்கத்துடன் சில போட்டிகளும் நடத்தப்படுவதாக அவர் குறிப்பிட்டார்.
''நவம்பர் 22 தொடங்கி நவம்பர் 30-ஆம் தேதி வரை முழக்கவரி போட்டி அனைத்து மாணவர்களுக்கும் நடத்தப்படுகிறது. இதில் வெற்றிப்பெறுவோரின் முழக்கவரி, தமிழோடு விளையாடு அதிகாரப்பூர்வ உரையில் பொறிக்கப்படும். மேலும், நவம்பர் 29-ஆம் தேதி நம் பண்பாட்டு மரபு சார்ந்த கருத்தரங்கு ஒன்று இணையம் வழி நடத்தப்படும்,'' என்றார் அவர்.
வரும் டிசம்பர் 27-ஆம் தேதி பினாங்கு, மலேசிய அறிவியல் பல்கலைக்கழத்தின் DKU மண்டபத்தில் தமிழோடு விளையாடு 4.0 நடைபெறும்.
--பெர்னாமா
[பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 11:30 (ஆஸ்ட்ரோ 502)]
