சிப்பாங், நவம்பர் 19 (பெர்னாமா) -- கடந்த நவம்பர் 18ஆம் தேதி கோலாலம்பூர் அனைத்துலக விமான நிலையம் கே.எல்.ஐ.ஏ வழியாக 42 லட்சம் ரிங்கிட் மதிப்புடைய 43.36 கிலோகிராம் எடையிலான கஞ்சா பூக்கள் வகை போதைப் பொருளை நாட்டிற்குள் கொண்டு வர முயற்சித்த ஜப்பானிய ஆடவர்கள் மூவரின் நடவடிக்கை அவர்களைக் கைது செய்ததன் வழி முறியடிக்கப்பட்டது.
அவர்கள் கொண்டு வந்த ஆறு பயணப் பெட்டிகளில் நெகிழிப் பைகளில் பொட்டலமிடப்பட்ட அந்த போதைப் பொருள் இருப்பது சோதனையின் வழி கண்டறியப்பட்டதை அடுத்து 19இல் இருந்து 42 வயதிற்குட்பட்ட அவர்கள் கைது செய்யப்பட்டதாகக் கே.எல்.ஐ.ஏ சுங்கத் துறை இயக்குநர் சுல்கிஃப்லி முஹமட் தெரிவித்தார்.
உலர்ந்த உணவுப் பொட்டலங்களில் அப்போதைப் பொருள் மறைத்து வைக்கப்பட்டிருந்ததாக இன்று வெளியிட்ட ஓர் அறிக்கையில் சுல்கிஃப்லி முஹமட் கூறினார்.
தொடர் விசாரணைக்காக இவ்வழக்கு சுங்கத் துறை அமலாக்கப் பிரிவிடம் ஒப்படைக்கப்பட்டது.
1952ஆம் ஆண்டு அபாயகரப் போதைப் பொருள் சட்டம் செக்ஷன் 39B(1)(a)வின் கீழ் இச்சம்பவம் விசாரிக்கப்படுகிறது.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
