கோத்தா கினபாலு, நவம்பர் 29 (பெர்னாமா) -- 17வது சபா மாநிலத் தேர்தலுக்கான வாக்குப்பதிவு சுமூகமாக நடைபெற்றது.
இன்று பிற்பகல் வரை, பெரிய அளவிலான சம்பவங்கள் எதுவும் பதிவு செய்யப்படாமல், தேர்தல் எவ்வித பிரச்சினையின்றி நடைபெற்றதாக தேசிய போலீஸ் படைத் தலைவர் டத்தோ ஶ்ரீ முஹ்மாட் காலிட் இஸ்மாயில் தெரிவித்தார்.
காலை மணி 7.30க்கு வாக்குச் சாவடிகள் திறக்கப்பட்டதிலிருந்து, வாக்காளர்களின் நடமாட்டம் சீராக இருந்ததாக டத்தோ ஶ்ரீ முஹ்மாட் காலிட் இஸ்மாயில் கூறினார்.
இருப்பினும், நண்பகல் 12 மணி நிலவரப்படி, தேர்தல் குற்றங்கள் தொடர்பாக 157 புகார்கள் கிடைத்துள்ளதாக அவர் தெரிவித்தார்.
அவற்றில் பெரும்பாலானவை கொடிகளை அகற்றுதல் மற்றும் சுவரொட்டிகளை சேதப்படுத்துதல் ஆகிய குற்றங்களாகும் என்று முஹ்மாட் காலிட் விவரித்தார்.
''எனவே, இதுவரை நாங்கள் 86 விசாரணை அறிக்கைகளைத் திறந்துள்ளோம். சட்டத்திற்கு எதிரான ஏதேனும் இருந்தால், டி.பி.பி-யின் அறிவுறுத்தல்களுக்காக நாங்கள் காத்திருக்கிறோம். நாங்கள் மேல் நடவடிக்கை எடுப்போம். தேர்தல் குற்றங்கள் தொடர்பான பல வழக்குகள் தொடர்பாகவும் நாங்கள் தேர்தல் ஆணையத்திடம் குறிப்பிட்டுள்ளோம். கூடுதலாக, சமூக ஊடகங்கள் தொடர்பான பிரச்சினைகள் மற்றும் பல தொடர்பில் எம்.சி.எம்.சி-யை நாங்கள் அணுகியிருக்கிறோம்,'' என டத்தோ ஶ்ரீ முஹ்மாட் காலிட் இஸ்மாயில் கூறினார்.
இன்று, கோத்தா கினாபாலு, சுங் ஹ்வா, சீனப் பள்ளியில் வாக்களிப்பு செயல்முறையை பார்வையிட்ட பின்னர், அவர் செய்தியாளர்களிடம் பேசினார்.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
