கோத்தா சமரஹான், நவம்பர் 29 (பெர்னாமா) -- கோலாலம்பூர் அனைத்துலக விமான நிலையம் கே.எல்.ஐ.ஏ-வில் வெளிநாட்டினர் இருவர் போலி கடப்பிதழ்களைப் பயன்படுத்தி நாட்டிற்குள் நுழைய முயற்சித்ததாக அண்மையில் பகிரப்பட்ட காணொளி உண்மையற்றது என்றும் அவர்கள் முறையான பயண ஆவணங்களுடனே பயணித்ததாகவும் உள்துறை அமைச்சர் டத்தோ ஶ்ரீ சைஃபுடின் நசுத்தியோன் இஸ்மாயில் தெரிவித்தார்.
போஸ்னியா மற்றும் சீன நாட்டவர்களான அந்த பயணிகளிடம் நடத்தப்பட்ட சோதனைகளின் வழி அவர்களிடம் முறையான கடப்பிதழ்கள் இருந்தது கண்டறியப்பட்டதாக அவர் கூறினார்.
''முக்கியமானது என்னவென்றால் நாங்கள் மேற்கொண்ட சோதனையில் அவர்களின் கடப்பிதழ் போலி இல்லை என்பது தெரியவந்தது. எங்களின் தரவில் உள்ளது. எந்த நுழைவாயில் மூலம் அவர்கள் உள்ளே நுழைந்தனர். உண்மையான கடப்பிதழ் இருந்தது. உண்மையான பயண ஆவணங்கள் இருந்தன.'' என்றார் டத்தோ ஶ்ரீ சைஃபுடின் நசுத்தியோன் இஸ்மாயில்.
இன்று சரவாக், கோத்தா சமரஹான், கம்போங் சின்டாங் பாருவில் மலேசிய மடானி நிகழ்ச்சி ஒன்றில் கலந்துகொண்டப் பின்னர் அவர் செய்தியாளர்களிடம் பேசினார்.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
