கோத்தா கினபாலு, நவம்பர் 29 (பெர்னாமா) -- 14 நாள்கள் பிரச்சாரத்திற்குப் பிறகு இன்று நடைபெற்ற 17வது சபா மாநிலத் தேர்தலுக்கான வாக்களிப்பு சீராக நிறைவுற்றது.
மாலை மணி 4 வரை 60.94 விழுக்காட்டு வாக்காளர்கள் வாக்களித்திருப்பதாகத் தேர்தல் ஆணையம் எஸ்.பி.ஆர் தெரிவித்திருக்கிறது.
2020ஆம் ஆண்டு நடைபெற்ற 16வது பொதுத் தேர்தலின் அதே காலகட்டத்தில் 62 விழுக்காட்டினர் அல்லது ஆறு லட்சத்து 85,300 பேர் வாக்களித்ததாக எஸ்.பி.ஆர் கூறியது.
17 லட்சத்து 40,000 வாக்காளர்கள் தங்களின் ஜனநாயகக் கடமையை நிறைவேற்றும் பொருட்டு தேர்தலுக்கான அனைத்து 882 வாக்குச் சாவடிகள் இன்று காலை மணி 7.30க்கு திறக்கப்பட்டன.
சபாவின் 73 சட்டமன்றத் தொகுதிகளை வெற்றிகொள்ள இம்முறை 596 வேட்பாளர்கள் களத்தில் இறங்கினர்.
இதில் 73 சுயேட்சை வேட்பாளர்கள் அடங்கியுள்ள வேளையில் எஞ்சியவர்கள் 22 அரசியல் கட்சிகளைப் பிரதிநிதித்து போட்டியிட்டனர்.
இன்று நண்பகல் மணி 12 தொடங்கி மாலை மணி 5.30க்குள் அனைத்து வாக்குச் சாவடிகளும் கட்டம் கட்டமாக மூடப்பட்டன.
இதனிடையே, இன்று காலை சபாவின் மேற்கு கடற்கரையில் பெய்த மிதமான மழை 17வது சபா மாநில பொதுத் தேர்தலில் வாக்களிக்கும் வாக்காளர்களின் ஆர்வத்தைத் தடுக்கவில்லை.
882 வாக்குச்சாவடிகள் காலை 7.30 மணிக்குத் திறக்கப்பட்ட போதிலும் காலை 7 மணிக்கே மக்கள் குடைகளை ஏந்திச் செல்வதைப் பெர்னாமா கண்டறிந்தது.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
