இலங்கை, நவம்பர் 28 (பெர்னாமா) -- இலங்கையில் கனமழையால் ஏற்பட்ட நிலச்சரிவுகள் மற்றும் வெள்ளத்தில் சிக்கி 40க்கும் மேற்பட்டோர் உயிரிழந்தனர்.
இதனால், அந்நாட்டின் சில பகுதிகளில் பயணிகள் ரயில்கள் நிறுத்தப்பட்டு சாலைகள் மூடப்பட்டதாக அதிகாரிகள் வியாழக்கிழமை தெரிவித்தனர்.
வெள்ளத்தினால் வீட்டினுள்ளும் வீட்டின் கூரையிலும் சிக்கித் தவித்தவர்களை ஹெலிகாப்டர் மற்றும் படகுகளைப் பயன்படுத்தி அமலாக்க அதிகாரிகள் காப்பாற்றினர்.
உயிரிழந்தவர்களில் 25 பேர் பதுளை மற்றும் நுவரெலியா எனும் வட்டாரத்தில் உள்ள தேயிலை தோட்டப் பகுதிகளைச் சேர்ந்தவர்கள் என்று அரசாங்கப் பேரிடர் நிர்வகிப்பு மையம் குறிப்பிட்டுள்ளது.
நேற்று அதே பகுதிகளில் ஏற்பட்ட நிலச்சரிவுகள் காரணமாக மேலும் 21 பேர் காணாமல் போயுள்ளதாகவும் 10 பேர் காயமடைந்துள்ளதாகவும் அம்மையத்தின் தரவுகள் காட்டுகின்றன.
கடந்த வாரம் கடுமையான வானிலையால் பாதிக்கப்பட்ட இலங்கையில் வார இறுதியில் பெய்த மழையால் வீடுகள், வயல்கள் மற்றும் சாலைகள் வெள்ளத்தில் மூழ்கி பேரழிவை ஏற்படுத்தியது.
நீர்த்தேக்கங்களும் ஆறுகளும் நிரம்பி வழிந்ததால் மாகாணங்களை இணைக்கும் சில முக்கிய சாலைகள் மூடப்பட்டுள்ளதாக அதிகாரிகள் தெரிவித்தனர்.
இந்தோனேசியாவில் வெள்ளத்தினால் பாதிக்கப்பட்டவர்களின் எண்ணிக்கை தொடர்ந்து அதிகரித்து வருகிறது.
அந்நாட்டின் சுமத்ரா தீவில் வெள்ளம் மற்றும் நிலச்சரிவுகளில் குறைந்தது 94 பேர் உயிரிழந்ததைத் தொடர்ந்து அங்குள்ள ஒரு பொது கல்லறையில் உடல்கள் அடக்கம் செய்யப்பட்டதாக அரசு நிறுவனங்கள் தெரிவித்தன.
வெள்ளத்தில் பாதிக்கப்பட்ட மக்கள் உணவு பற்றாக்குறையினாலும் மின்சார வசதியின்றியும் சிக்கலை எதிர்நோக்கி வருகின்றனர்.
அதேவேளையில் தாய்லாந்தின் தெற்கு மாகாணங்களில் ஏற்பட்ட வெள்ளத்தில் சிக்கி உயிரிழந்தவர்களின் எண்ணிக்கை 87ஆக உயர்ந்துள்ளது.
அதோடு, 35 லட்சத்திற்கும் அதிகமான மக்கள் பாதிக்கப்பட்டுள்ளதாக அந்நாட்டு அரசு தெரிவித்துள்ளது.
தாய்லாந்தின் மிகவும் பாதிக்கப்பட்ட பகுதியான ஹாட் யாய்-யில் மழை பொழிவது நின்றுவிட்டாலும் குடியிருப்பாளர்கள் வெள்ளநீர் இன்னும் வடியவில்லை.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
