சபா, 30 நவம்பர் (பெர்னாமா) -- நேற்று நடைபெற்ற 17-வது சபா மாநிலத் தேர்தலில் வாரிசான் கட்சி தலைவர் டத்தோ ஶ்ரீ முஹமட் ஷஃபி அப்டால் தமது செனாலாங் தொகுதியைத் தற்காத்துக்கொண்ட வேளையில், சபா மாநில தேசிய முன்னணி தலைவர் டத்தோ ஶ்ரீ புங் மொக்தார் ரடின் தமது லாமாங் தொகுதியைத் தக்கவைத்துக் கொண்டிருக்கின்றார்.
அதேவேளையில், அத்தேர்தலில் போட்டியிட்ட நான்கு மத்திய துணை அமைச்சர்களில் இருவர் வெற்றி பெற்றுள்ளனர்.
தேர்தல் ஆணையத்தின் தகவல்படி, செனாலாங் தொகுதியில் நான்குமுனை போட்டியை எதிர்கொண்ட செம்போர்னா நாடாளுமன்ற உறுப்பினருமான டத்தோ ஶ்ரீ முஹமட் ஷஃபி 6,837 வாக்குகள் பெரும்பான்மையில் வெற்றி பெற்றார்.
இத்தேர்தலில் வெற்றி பெற்ற சபா மக்கள் கூட்டணி, ஜி-ஆர்.எஸ்-ஸிடம் வாரிசான் கட்சி மூன்றே தொகுதிகள் வித்தியாசத்தில் தோல்வி கண்டது.
அதேவேளையில், லாமாங் தொகுதியில் ஆறுமுனை போட்டியை எதிர்கொண்ட டத்தோ ஶ்ரீ புங் மொக்தார் 153 வாக்குகள் பெரும்பான்மையில் வெற்றி பெற்றார்.
இதனிடையே, துணை அமைச்சர்களைப் பொருத்தவரையில், சூக் தொகுதியில் தம்மை எதிர்த்து போட்டியிட்ட விவசாயம் மற்றும் உணவு உத்தரவாத அமைச்சர் டத்தோ ஶ்ரீ அர்தர் ஜோசப் குரூப் 4,727 வாக்குகள் பெரும்பான்மையில் அத்தொகுதியைத் தற்காத்து போட்டியிட்ட டத்தோ ஏல்ரொன் அங்கின் உட்பட நால்வரை தோற்கடித்தார்.
சிலாம் சட்டமன்றத் தொகுதியில் எட்டுமுனை போட்டியை எதிர்கொண்ட அறிவியல், தொழில்நுட்பம் மற்றும் புத்தாக்க துணை அமைச்சர் டத்தோ முஹமட் யூசோப் அப்டால் 1,257 வாக்குகள் பெரும்பான்மையில் வெற்றி பெற்றார்.
மற்றொரு நிலவரத்தில், இத்தேர்தலில் எட்டு தொகுதிகளில் போட்டியிட்ட ஜ.செ.க எந்தவொரு தொகுதியிலும் வெற்றி பெறவில்லை.
சம்பந்தப்பட்ட எட்டு தொகுதிகளிலும் வாக்களர்களின் முடிவை தங்கள் கட்சி மதித்து ஏற்றுக் கொள்வதாக அதன் பொதுச் செயலாளர் அந்தோணி லோக் தெரிவித்தார்.
இந்த முடிவை படிப்பினையாகக் கொண்டு கட்சியின் தலைமைத்துவம், அனைத்து பலவீனங்களையும் மறு மதிப்பீடு செய்து அடுத்த தேர்தலில் மக்களின் ஆதரவை மீண்டும் பெற பாடுபடவிருப்பதாக தனது அதிகாரப்பூர்வ முகநூல் பதிவில் அவர் குறிப்பிட்டுள்ளார்.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 11:30
(ஆஸ்ட்ரோ 502)
