ஈப்போ, நவம்பர் 28 (பெர்னாமா) -- மற்றொரு நிலவரத்தில், நேற்று மாலை தொடங்கி தீபகற்ப மலேசியை தாக்கிய சென்யார் வெப்பமண்டலப் புயலினால் பேராக் மாநிலம் கடுமையாக பாதிக்கப்படவில்லை என்றாலும், அதற்கான முன்னெச்சரிக்கை நடவடிக்கைகளை அம்மாநில அரசாங்கம் மேற்கொண்டு வருவதாக அம்மாநில மந்திரி புசார் டத்தோ ஶ்ரீ சரானி முஹமட் கூறினார்.
"நாங்கள் கடுமையாக பாதிக்கப்பட்டிருப்பதாக கூறும் எந்தவொரு தகவலும் எனக்கு கிடைக்கவில்லை. ஆனால், முதற்கட்ட வானிலை அறிக்கையில், பாதிக்கப்பட்ட பகுதியில் பேராக் மாநிலமும் ஒன்று என்று கூறப்பட்டது" என டத்தோ ஶ்ரீ சரானி முஹமட் கூறினார்.
சென்யார் வெப்பமண்டல புயலால் பாதிக்கப்படும் என்று கணிக்கப்பட்டுள்ள பகுதிகளில் சிலாங்கூருக்கு அருகிலுள்ள இடங்கள் உட்பட பேராக் மாநிலமும் அடங்கும்.
கோலா கங்சார், முவாலிம், ஹிலிர் பேராக், பத்தாங் பாடாங், மஞ்சோங், பேராக் தெங்கா, பாகான் டத்தோ மற்றும் தைப்பிங் ஆகிய மாவட்டங்களில் வீசிய பலத்த காற்றினால், நேற்று மாலை முதல் இன்று காலை 6 மணி வரை 10க்கும் மேற்பட்ட மரங்கள் சாய்ந்ததாக, முன்னதாக மலேசிய பொது தற்காப்புப் படை, ஏ.பி.எம் தெரிவித்திருந்தது.
வெள்ளிக்கிழமை பேராக் டாரூல் ரிட்சுவான் கட்டிடத்தில் மாநில சட்டமன்ற உறுப்பினர்களுக்கான தகவல் அமைப்பு, இ ஏ.டி.என்-னை தொடக்கி வைத்த பிறகு அவர் செய்தியாளர்களிடம் பேசினார்.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
