தாய்லாந்து, நவம்பர் 28 (பெர்னாமா) -- டிசம்பர் 9 முதல் 20ஆம் தேதி வரை தாய்லாந்தில் நடைபெறும் 2025 சீ விளையாட்டுப் போட்டிகளுக்காக, சோங்க்லா-வில் நடைபெறவிருந்த 10 விளையாட்டுப் போட்டிகளை பேங்காக்கிற்கு மாற்ற ஒப்புதல் அளிக்கப்பட்டுள்ளது.
தெற்கு தாய்லாந்தில் ஏற்பட்ட வெள்ளத்தைத் தொடர்ந்து, ஈராண்டுகளுக்கு ஒருமுறை நடைபெறும் இந்த சீ விளையாட்டுப் போட்டி மற்றும் 13-வது ஆசியான் பாரா விளையாட்டுகளுக்கான ஏற்பாட்டு குழு கூட்டத்தில், இடமாற்றம் குறித்த முடிவெடுக்கப்பட்டதாக அதன் அதிகாரப்பூர்வ முகநூல் பதிவில் குறிப்பிடப்பட்டுள்ளது.
தாய்லாந்தின் சுற்றுலா மற்றும் விளையாட்டு அமைச்சர் அத்தாகோர்ன் சிரிலாத்தாயாகோன், தலைமையில் நடைபெற்ற இக்கூட்டத்தில், தாய்லாந்து விளையாட்டு ஆணைய ஆளுநர் டாக்டர் கொங்சாக் யோட்மானீ, விளையாட்டு சங்கங்களின் பிரதிநிதிகள் மற்றும் அதன் தொடர்புடைய அதிகாரிகள் கலந்து கொண்டனர்.
தாய்லாந்தின் தெற்குப் பகுதிகளில் ஏற்பட்ட கடுமையான வெள்ளம் காரணமாக, 33வது சீ விளையாட்டுகள் மற்றும் போட்டி நடைபெறும் இடங்களை மாற்றுவது குறித்து அக்கூட்டத்தில் முதன்மையாக விவாதிக்கப்பட்டது.
குறிப்பாக, டிசம்பர் 9 முதல் 20 வரை இப்போட்டி நடைபெற திட்டமிடப்பட்டுள்ள வேளையில், அதனை இணைந்து நடத்தும், சோங்க்லா மாகாணத்தில், வெள்ளம் காரணமாக தயார்நிலை பணிகள் பாதிக்கப்பட்டுள்ளது.
காற்பந்து, சதுரங்கம், கபடி, வுஷு, சிலாட், ஜூடோ, கராத்தே மற்றும் மல்யுத்தம் என மொத்தம் 10 விளையாட்டு போட்டிகள் சோங்க்லாவிலிருந்து பேங்காக்கிற்கு மாற்றப்பட்டுள்ளன.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
