புத்ராஜெயா, நவம்பர் 29 (பெர்னாமா) -- பிரதமரின் முன்னாள் மூத்த அரசியல் செயலாளர் டத்தோ ஶ்ரீ ஷம்சுல் இஸ்கண்டார் முஹமட் அகின் மற்றும் தொழிலதிபர் அல்பெர்ட் தே ஜியான் சியாங் ஆகிய இருவரும் டிசம்பர் நான்காம் தேதி வரை ஆறு நாள்களுக்குத் தடுப்புக் காவலில் வைக்கப்படுவர்.
தடுப்பு காவல் உத்தரவிற்காக, மலேசிய ஊழல் தடுப்பு ஆணையம் எஸ்.பி.ஆர்.எம் செய்திருந்த விண்ணப்பத்திற்கு அனுமதி அளிக்கும் வகையில் புத்ராஜெயா மாஜிஸ்திரேட் நீதிமன்றத்தின், மாஜிஸ்திரேட் ஃபாதின் முனிரா சோஃபியான் அந்த உத்தரவைப் பிறப்பித்தார்.
ஷம்சுல் இஸ்கண்டார் மற்றும் தேஆகிய இருவரின் வழக்கறிஞர்களான யுஸ்மாடி யூசோஃப்பும், மஹாஜோத் சிங்கும் இவ்விவகாரத்தை உறுதிப்படுத்தினார்.
மேலும், 2009ஆம் ஆண்டு எஸ்.பி.ஆர்.எம் சட்டம் செக்ஷன் 16-இன் கீழ் விசாரணைகளுக்கு உதவுவதற்காக அவர்கள் தடுத்து வைக்கப்பட்டுள்ளதாக அவ்விருவரும் கூறினர்.
ஊழல் குற்றச்சாட்டுகள் தொடர்பில் கைது செய்யப்பட்டுள்ள பிரதமரின் முன்னாள் மூத்த அரசியல் செயலாளர் டத்தோ ஶ்ரீ ஷம்சுல் இஸ்கண்டார் முஹமட் அகின் மற்றும் தொழிலதிபராகிய அல்பெர்ட் தே ஜியான் சியாங் ஆகிய இருவரும் இன்று காலை புத்ராஜெயா நீதிமன்றத்திற்கு அழைத்து வரப்பட்டனர்.
தடுப்பு காவல் உத்தரவை விண்ணப்பிக்கும் பொருட்டு, மலேசிய ஊழல் தடுப்பு ஆணையம் எஸ்.பி.ஆர்.எம் அதிகாரிகள் அவ்விருவரையும் ஆணைய வாகனத்தில் அழைத்து வந்தனர்.
கைவிலங்கிடப்பட்ட நிலையில், எஸ்.பி.ஆர்.எம்-இன் சிறை உடையை அணிந்திருந்த அவ்விருவரும் ஊழல் குற்றச்சாட்டுகள் தொடர்பான விசாரணைக்கு உதவும் பொருட்டு எஸ்.பி.ஆர்.எம் அதிகாரிகளால் புத்ராஜெயா மாஜிஸ்திரேட் நீதிமன்றத்திற்கு அழைத்து வரப்பட்டனர்.
சபா மாநில சட்டமன்ற உறுப்பினருக்கு வழங்கப்பட்ட பணத்தை மீட்பதற்காக ஷம்சுல் இஸ்கண்டாருக்கு அல்பெர்ட் தே கையூட்டு வழங்கியதாகக் கூறப்படும் வழக்கு விசாரணைக்கு உதவுவதற்காக, நேற்று எஸ்.பி.ஆர்.எம் அவர்களுடன் சோஃப்பியா ரினி பூயோங் எனும் பெண் ஒருவரையும் கைது செய்திருந்தது.
வாக்குமூலங்களை வழங்கிய பின்னர் ஷம்சுல் இஸ்கண்டாரும், சோஃப்பியா ரினியும் எஸ்.பி.ஆர்.எம் தலைமையகத்தில் தடுத்து வைக்கப்பட்ட நிலையில் பூச்சோங்கில் உள்ள தமது வீட்டில் தே கைது செய்யப்பட்டார்.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
