கோலாலம்பூர், நவம்பர் 18 (பெர்னாமா) -- மின்சாரம் அல்லது கலப்பு வாகனங்களுக்கு மாறுவதை ஊக்குவிக்கும் வகையில், BUDI 95 திட்டத்தின் கீழ் எரிபொருளுக்கு வழங்கப்படும் உதவித் தொகையை, ரொக்க கழிவாக மாற்ற அரசாங்கம் திட்டமிடவில்லை.
இந்நடவடிக்கை BUDI 95 திட்டத்தைச் செயல்படுத்துவதன் நோக்கத்தை மாற்றிவிடும் என்பதோடு, பெட்ரோல் இயந்திர வாகனங்களை நம்பியிருக்கும் பிரிவினருக்கு இலக்கிடப்பட்ட உதவித் தொகையின் செயல்திறனை பாதிக்கக்கூடும் என்று, இரண்டாவது நிதி அமைச்சர் டத்தோ ஶ்ரீ அமிர் ஹம்சா அசிசான் தெரிவித்தார்.
BUDI95 திட்டம் மின்சாரம் அல்லது கலப்பு வாகனங்களுக்கு மாறுவதை ஊக்குவிக்கும் நோக்கம் கொண்டதல்ல என்று அமிர் ஹம்சா கூறினார்.
“BUDI95-இன் முக்கிய நோக்கம் என்னவென்றால் மொத்த உதவித் தொகையிலிருந்து இலக்கிடப்பட்ட உதவித் தொகைக்கு மாறுவதாகும். எரிபொருள் உதவி உண்மையிலேயே தேவைப்படுபவர்களுக்கும், வருமான ஆதாரமாகவோ அல்லது அன்றாடத் தேவைகளாகவோ பெட்ரோலைச் சார்ந்திருப்பவர்களுக்கும் தொடர்ந்து வழங்கப்படுவதை உறுதி செய்வதாகும்,“ என்றார் அவர்.
இன்று, மேலவையில், செனட்டர் டாக்டர் லிங்கேஸ்வரன் ஆர்.அருணாசலம் எழுப்பியக் கூடுதல் கேள்விக்கு அமிர் ஹம்சா அவ்வாறு பதிலளித்தார்.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
