கோப்பெங், நவம்பர் 30 (பெர்னாமா) -- பேராக், கோப்பெங் மாவட்டத்தில் அமைந்துள்ள கோத்தா பாரு, கம்போங் தெர்சூசூன் மூன்றரை மைலில் வசித்து வரும் கிராம மக்களின் 40 ஆண்டு கால நிலப்பிரச்சனை போராட்டத்திற்கு விடிவு பிறந்தது.
அங்கு வசித்து வருவோரில் 146 குடும்பங்கள், நிரந்திர வசிப்பிடம் பெறுவதற்காக கடந்த 1993-ஆம் ஆண்டு செய்திருந்த விண்ணப்பத்திற்கு 2019-இல் அங்கீகாரம் வழங்கப்பட்டிருந்ததாக மாநில ஆட்சிக்குழு உறுப்பினர் டத்தோ அ.சிவநேசன் தெரிவித்திருந்தார்.
அதைத் தொடர்ந்து தாம் மேற்கொண்ட தொடர் நடவடிக்கைகளின் பலனாக அதில் முதல்கட்டமாக 16 இந்தியக் குடும்பங்களுக்கு நில உறுதிக் கடிதம் வழங்கப்பட்டிருக்கும் வேளையில், மற்றவர்களின் நிலப்பிரச்சனைக்கும் விரைவில் தீர்வு காணப்படும் என்றும் அவர் உறுதி கூறினார்.
"இப்பகுதியில் அதிகமான இந்தியர்கள் வசிக்கிறார்கள். அதிலும் சுற்றியுள்ள சில தோட்டங்கள் துண்டாடப்பட்ட வேளையில், அங்கிருந்த சில குடும்பத்தினரும் இங்குள்ள அரசாங்க நிலத்தில் பட்டாக்கள் ஏதுமின்றி சொந்தமாக வீடுகட்டி வசித்து வந்தனர். இன்று இங்குள்ள 16 இந்தியக் குடும்பங்களுக்கு மாநில அரசாங்கத்தின் அங்கீகாரம் பெற்ற நில உறுதிக்கடிதத்தை வழங்கி இருந்தோம்," என்று அவர் விவரித்திருந்தார்.
இன்னும் இப்பகுதியில் அமைக்கப்பட்டு வரும் ஶ்ரீ அர்ஜனேஸ்வர திரௌபதி அம்மன் ஆலயம் மற்றும் பொதுமண்டபத்திற்கான குளிர்சாதனம் பொருத்துவது உள்ளிட்ட அனைத்திற்கும் மாநில அரசாங்கத்தின் கீழ் அடுத்தாண்டு தாம் நிச்சயம் நிதி வழங்குவதாகவும் அவர் கூறினார்.
மேலும், பேராக் மாநிலத்தில் சேவையாற்றிய இந்தியர்களின் பெயர்களை அக்குடியிருப்பு பகுதிக்கு சூட்ட விரும்பினால் அதற்கான முறையான ஆவணங்களை தம்மிடம் சமர்ப்பிக்குமாறும் சிவநேசன் கேட்டுக் கொண்டார்.
இதனிடையே, நில உறுதிக்கடிதத்தைப் பெற்றுக் கொண்டவர்களில் சிலர் தங்களின் மகிழ்ச்சியை பெர்னாமாவிடம் பகிர்ந்து கொண்டனர்.
"நாங்கள் நாற்பது ஆண்டுகளுக்கும் மேலாக இங்கு வசித்து வருகிறோம். இத்தனை ஆண்டுகால போராட்டத்திற்குப் பின்னர் நில உறுதிக் கடிதத்தை எங்களுக்கு வழங்கியதில் மிக்க மகிழ்ச்சி. இனி இக்கடிதத்தைக் கொண்டு தைரியமாக சொந்த வீடு கட்டிக் கொள்வோம்," என்று முனியம்மா குப்புசாமி என்பவர் தெரிவிதார்.
"30 ஆண்டுகளுக்கு முன்னதாகவே இந்நிலம் வழங்கப்பட்டு நாங்கள் குடியேறினோம். அதற்கிடையே 145 லோட் விண்ணப்பித்து கடந்த 1993-ஆம் ஆண்டு கம்போங் தெர்சூசூன் தம்பாஹான் என்று விண்ணப்பித்திருந்தோம். அதில் ஒரு பகுதியாக 16 பேருக்கு இன்று உறுதிக் கடிதம் கிடைத்துள்ள போராட்டத்திற்கு கிடைத்த வெற்றியாக கருதுகிறேன்," என்று கிராமத் தலைவரான சுப்பிரமணியம் சிவராமன் கூறினார்.
கிராம மண்டபத்தில் நடைபெற்ற விழாவில் சம்பந்தப்பட்ட 16 குடும்பங்களும் நில உறுதிக் கடிதத்தைப் பெற்றுக் கொண்டனர்.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
