கோலாலம்பூர், நவம்பர் 30 (பெர்னாமா) -- சமய அறிவை வளப்படுத்துவதுடன் சைவ ஆகம நெறிகளுக்கு முரணான சடங்குகளைப் புறக்கணித்து ஆகம விதி முறைகளுக்கு ஏற்ப வழிபாடுகள் செய்வதை ஊக்குவிக்குப்பதற்காக கடந்த 2011ஆம் ஆண்டில் மலேசிய சைவ சமயப் பேரவை தொடங்கப்பட்டது.
தற்போது 14-வது ஆண்டில் அடியெடுத்து வைக்கும் அப்பேரவை, சமய ஆசிரியர்களுக்கான பயிற்சிக் கல்லூரியுடன் சைவ திருக்கோயிலையும் உருவாக்கும் அறப் பணியைத் தொடங்கியுள்ளதாகக் கூறுகிறார், மலேசிய சைவ சமயப் பேரவையின் செயலாளர் செல்வகுமாரன் நடராஜன்.
சைவ சிந்தாந்த மாணவர்களின் முழு முயற்சியில் 18 லட்சம் ரிங்கிட் நிதி திரட்டப்பட்டதுடன், இத்திட்டதிற்காக சுமார் 7.49 ஏக்கர் நிலத்தையும் பேரவை முன்னதாக வாங்கியிருந்தது.
இந்த சைவ திருக்கோயிலையும் கல்லூரியையும் நிறுவுவதற்கு சிலாங்கூர் மாநில அரசாங்கம் அனுமதி வழங்கியிருப்பதால், அரசாங்கத்தின் முழு ஆதரவுடன் அது துரிதமாக நடைபெற்று வருவதாக கூறிய செல்வகுமாரன் நடராஜன், அவற்றிற்கான நோக்கம் குறித்தும் பகிர்ந்து கொண்டார்.
"கிரியை தொடர்பான அறிவினையும் செயல்முறையையும் இவ்வாலயம் கற்றுக் கொடுக்கும். சைவ சமயத்தின் பால் ஈடுபாட்டையும் பக்தி உணர்வையும் பெருக்கும் நோக்கில் திருக்கோயிலின் செயல்பாடு அமையும். சைவ சமய கல்லூரியில் பயிலும் மாணவர்கள் குறைந்தது படிவம் ஐந்து கல்வியில் தேர்ச்சி பெற்றிருக்க வேண்டும். அத்தகையை மாணவர்கள் இங்கு தங்கிப் படிப்பதற்கான முழு செலவினையும் அறவாரியமே ஏற்றிக் கொள்ளும்," என்றார் அவர்.
அதோடு, ஆலயங்களில் அர்ச்சகர்களுக்கான பயிற்சியும் ஓதுவார் திருமுறைப் பயிற்சியும் அம்மாணவர்களுக்கு முறையாக கற்பிக்கப்படும் என்பதால் நாடு முழுவதும் அவர்களால் சமயப் பணி ஆற்ற முடியும் என்று செல்வகுமாரன் பெர்னாமா செய்திகளிடம் நம்பிக்கைத் தெரிவித்தார்.
ஆலயம் மற்றும் சமய கல்லூரிக்கு அப்பாற்றப்பட்டு இரட்டை மாடிகள் கொண்ட திருமண மண்டபம், தியானக் குடில்கள், 1,200 பேர் அமரக்கூடிய ஒரு மாநாட்டு மண்டபம் போன்ற பல்வேறு கட்டுமானங்கள் அங்கு உருவாக்கப்படுவதால், இந்தியர்களின் ஓர் அடையாளச் சின்னமாகவும் அது இருக்கும் என்று அவர் கூறினார்,
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
